مباهج القهوة
أجل، صدّقوها يا أهل الخير - حصل ما حصلش مايهمكش بقى - القهوة حبستني كده، سجنتي، وأنا زمبي ايه بس، غير الإدمان والإفراط...
فإنه حدث بالأمس القريب، أغرب الغرايب وأعجب العجيب،
دخلت القهوة، قعدت جمب الأشباح وأوهام الرفقاء، قلعت البرنيطة التي كثيرا ما تزدان بها راسي شئت أم أبيت، شاورت للسفرجي قلتله قهوة سادة من فضلك وخليها سخنة، سخنة خالص وعاملة زي عيون الموت، ربنا يخلّيك،
قاللي حاضر، أجيبهالك فورا... وفورا فعل، وقعد جمبي بيشجعني على الاستمتاع بالمشروب اللي عمله مخصوص، قال تعجبك يا زوزو.
قلتله ايه ده، زوزو مين ومخصوص ايه، أنا اسمي بنبن، اللي بتاع القهوة السادة، قاللي مانا عارف بس جرّب كده يا زوزو وأكون أنا من الشاكرين. قلتله حاضر، أجربها فورا، بس محتاج شوية خصوصية،
قاللي لأ عيب كده يا زوزو، القهوة لوحدها ماتتشربش: مانيش متعتع من الكرسي دلوت. قلتله حاضر.
بصيت فيها - بصيت في القهوة يعني - شكلها سادة زي مانا طلبت. عاملة زي مراية، بتشوف فيها وشّك.
ولحد دلوقتي، ماقدرش أشيل نفسي من الفنجان ده.
بيجيلي صوت من برا الفنجان، بيقوللي يا زوزو، مش أنا قلتلك، مخصوص يعني مخصوص،
قلتله لأ، فيه حد معاي هنا، شبهك.
أجل لقد حدث شيء من هذا القبيل، على ما أظن.
المهزلة
المسرح!
عسى أن يكون مسرح كوميديا،... بلى ألا إنه لذلك!
فيه ذوبان الأنا، والعبث بالحنا
به ارتفاع الحناجر، وانتصار الكافر وهو انتصار باهر
المجون.
الشجرة الآكلة للحوم البشر
من الخرافات الأكثر إثارة للقهقهة المترامية الأصداء تلك المترددة حول الشجرة العظيمة، المتشعبة، الممتدة الفروع، مثلها مثل الأخطبوط، براعمها أقرب ما تكون الى براثن الوحوش المفترسة، تلتهم البشر - أشرف ما خلق الرب - التهاماً ينقصه الشرف، والمجد. أما أراضيها المعتادة، فبالطبع في أرجاء قصية لا تخطوها الأقدام إلا نادراً، ولكن المعروف، المسجّل، أن هذه الأقدام لا تحملها سوى الجزمة القديمة، أو بالعكس - الأقدام هي التي تقود الجزمة، وهو الأرجح. عسى أن تكون هذه الأقدام ممتلئة، تنتمي الى شخص ممتلئ، متختخ، مجعلص، شخص ملو هدومه وأكثر، ان جاز التعبير. أصل الشجرة الخرافية دي متشبعش الا لما تبقى عندها فريسة كبيرة حاكم الظروف كده الشجرة ماتلقاش فريسة بسهالة.
طبعا هناك ما يسمى بخناق الذباب، زرعة يعني، بتاكل الحشرات. لا حول ولا قوة الا بالله.
النشاز الفكري
وأنا قاعد بكلم صاحبي، وجمبه صاحبته، قاللي ايه، لأ مش هو اللي قال كده انما صاحبته، صاحبته راحت بتكلم عن الناس اللي ما بيعرفوش بيكلموا دوغري وصحيح، يعني عمالين يرغوا حاكم مش لاقيين الكلمات اللي هما عايزينها، يروحوا يكلموا لغاية ماتلاقوا الغرض، المهم، والفكرة الأساسية. قالتلي انه الناس دول عندهم حاجة اسمها النشاز الفكري، مالهمش تركيز، ويبقوا صعبانين شوية، مانقدرش نستحملهم.
مش عارف ايه اللي خلاها تفكر في الموضوع ده.
